Na Luluqa Ni Veika Sa Yaco Tiko

Ni Sa Bula,

Oqo na i tukutuku e vaka-tabakiduataki vei kemuni na noda liga ni wau ni mataivalu ka ko ni dau wilika na vei volavolai vaka oqo.E sega ni vakataratututaki ni vuqa vei kemuni sa dau wilika tiko, wasea ka dau veitalanoataka na veika e dau tabaki mai e na vei sala ni taba ni tukutuku vaka oqo vei ira na nomuni daulomani kei ira o ni dau veivakabauti kaya.Na veika o ni na dau wasea, e vu tiko ga mai na kena sa laurai ni sa dua tani na mua ni lakolako sa goleva tiko na veilutaki ni noda mataivalu kei ira e ra sa mai liutaki keda e na matanitu sa mai duri tu oqo.Sa vakatataro tu na yalo yadua vei kemuni se sa mua e vei na i lakolako oqo kei na veika e dodonu o ni sa cakava tiko se segai me baleta ga na kena sa mai vakasivoi na matanitu a digitaki mai vei ira na lewe i Viti.

Sa basika vakamalua ni sa luluqa na veimaliwai e na vanua ni cakacaka ka i dusidusi vei kemuni na lomana na noda vanua ni sa tiko na leqa ka sa tu vei kemuni na kena madigi se sa sala cava o ni sa na digia.

Na i matai ni vakatakilakila ni sa tiko na leqa e na veikeba ni mataivalu ni noda vanua, o ya na nodratou sa vesu tiko na lewe tolu vei kemuni na lewe ni noda mataivalu mai na keba mai Labasa ka sa tau tiko vei iratou na veibeitaki ni ratou saqata ka via vuaviritaka na lewa mai Sukanaivalu. Oqo na i vakadinadina ni o ni sa sega ni duavata kece tiko ki na veilutaki e sa vakaroti tiko yani e na keba e Delainabua. Keimami sa vakavinavinakataki kemudou na lewe tolu oqo e na nomudou tu vakatagane ka raica rawa na dina ni veika sa vakayacori tiko e na noda vanua. Keimami vakabauta na lewe ni noda vanua ka sa tabonaki na veika keimami nanuma ni vuqa vei keimuni na noda liga ni wau ni noda mataivalu e sa cilavi kemuni rawa na rarama ni sa cala tu na ka e sa mai tara tu oqo na noda vanua ka keimami sa vakamamasu tale ga kina vei keimuni mo ni tutaka na dina ka tokoni keimami e na kena sasagataki me lesu na veiliutaki e na noda digidigi na lewe ni vanua de o ni qai oka vata tu kei ira e ra sa cala tu.

Sa rogo tale ga mai ni sa vakacegui tu vakawawa e dua na turaga-ni-valu baleta ga ni a tu saqata na lewa nei koya e sa mai taura tu vakaloa na i tutu ni daunivakasala vaka-lawa e na matanitu sa mai duri tu ni kua. Oqo na i vakaraitaki ni sega ni tu raviti kemuni o Bainimarama e na gauna o ni sotava kina e dua na veileti se leqa ka ni sa saga vakaukauwa o koya me maroroi koya mada ga vakataki koya. Na veitaro e tu e yaga mo ni na taroga na lewe ni noda mataivalu o ya se cava na vuna a sega ni tu kina vakatagane e na loma ni keba e na yabaki 2000 e na gauna a vakayacori kina na veivanavanai mai Delainabua? Na i karua ni taro o ya, se cava na vuna e sa sasagataka kina vakaukauwa o Bainimarama me kakua ni tini botoilevu tu na vuaviri e sa mai vakayacora tu oqo ki na noda vanua? E na duidui na noda rai e na tikina oqo ia vei au, na ka sa mai vakayacora oqo o Bainimarama e vakaraitaka ga na nona via maroroa na kena i rogorogo e na duka e sa binia tu.

E so vei kemuni na lewe ni noda mataivalu momo qaqa e ra a sa kere vakacegu se sa vakacegui vakatawa dodonu e na vuku ga ni nodra sega ni duavata kei na nona veiliutaki o Voreqe. Oqo o ira na noda lewe ni mataivalu e ra tu taka na dina mai na veika vaka tawa dodonu, na dina mai na nodra rawa ka vakailoa na so kei na veika e da vakabauta ni dodonu mai na ka e da na qai rawata mai muri ni da sa vakayacora oti e dua na ka e tawa dodonu. Na vua ni nona veiliutaki na i liuliu ni noda mataivalu sa vakaraitaki koya tiko ga mai ko gauna ka'u vakabauta ni nodratou sa vakasivoi na lewe tolu mai Labasa, e sa qai tekitekivu ni veika e bera mai ka ni sa tekivu rogo na kudru kei yamasamasa e na loma ni vei keba e na noda vanua.

Cakava na ka dodonu ka kerea na nomu galala mai na veika dukadukali e sa vakayacori tiko ka oqo e na dua na ka o na sega ni dusi kina ia na vakacaucautaki ga kina ni o sa vakayacora e dua na ka e dodonu e na kena gauna dodonu. Oqo tale ga e dua na i tovo o na rawa ni dokadokai iko kina ka o na tu doudou e na matadra na wekamu, o ira na nomu i tokani kei ira na nomuni daulomani ni o sa kila na dina o a tu taka kei na vakacegu ni yalomu.

Na i dusidusi ni sa sega ni dodonu na veika e sa vakayacori tiko ka o sa rogoca tiko na domo ni Kalou ki na nomu bula e sa dodonu me i vakadei ni nomu bula mo na vakayacora kina na ka dodonu ka riba tani mai na veileqa sa tu.

Tu vaka-tagane ka tutaka na dina ka na sega ni na vakatitiqa kina na yalomu!

E da nanumi ira na vei yaca e so me vakataki Bainimarama, Leweni kei Driti ka ra a vakacacana na noda bula ni veimaliwai kei na bula vakaveiwekani e na veigauna mai muri.

Oqo na i rairai ni noda mataivalu e na gauna oqo e na kena sa mai vakarusai vakadua na i yaloyalo e ra a boroa tu mai o ira na tamada kei ira na tukada e na nodra gauna mai na veibuca ni valu e ra a la'ki vakaitavi taki ira kina me baleta wale ga na nodra lomana ka tu taka na noda vanua lomani oqo.

Ia, ni sa vaka-gauna na veika kece ga, au vakabauta ni se sega ni bera kevaka mo ni na tutaka tale na veika e dau kilai tani kina na noda i mataivalu e na veigauna sa oti ka ra a solia kina na nodra bula na tamada kei ira na tukada.

Kukumatua ki na veika-vinaka e ra a sa viri kotora oti tu na noda qase ka kalawa yani ki na vei-vakagalalataki mai na ca sa bini koto.

Keimami na dokai iko kina e na nomu tu dei ki na noda yavu ni vakabauta e kilai tani kina na lewe i Viti.

Me maroroi Viti tiko ga na noda Turaga mai Lomalagi!